Ad populum dimittendum, diaconus vel, eo absente, ipse sacerdos cantat vel dicit: Ite, missa est, allelúia, allelúia. Omnes respondent: Deo grátias, allelúia, allelúia. Quod servatur per totam octavam Paschæ. Ad Missam in die Víctimæ pascháli laudes ímmolent Christiáni. Agnus redémit oves: Christus ínnocens Patri reconciliávit peccatóres. Mors et vita duéllo conflixére mirándo: dux vitæ mórtuus regnat vivus. Dic nobis María, quid vidísti in via? Sepúlcrum Christi vivéntis, et glóriam vidi resurgéntis: Angélicos testes, sudárium et vestes. Surréxit Christus spes mea: præcédet suos in Galilǽam. Scimus Christum surrexísse a mórtuis vere: tu nobis victor Rex miserére. Deus, qui per resurrectiónem Unigéniti sui dignátus est vobis bonum redemptiónis adoptionísque conférre, sua benedictióne vos tríbuat congaudére. Et quo rediménte percepístis donum perpétuæ libertátis, eo largiénte hereditátis ætérnæ consórtes éffici valeátis. Et cui resurrexístis in baptísmate iam credéndo, adiúngi mereámini in pátria cælésti nunc recte vivéndo. Et vos omnes, qui simul adéstis, benedícat vos omnípotens Deus Pater, et Fílius, et Spíritus Sanctus.